Sama gildir um netið og margar aðrar tækninýjungar í gegnum tíðina, það býður upp á mikla möguleika en því fylgja líka skuggahliðar. Við sem erum foreldrar barna 18 ára og yngri þurfum að gera ráð fyrir Netinu við uppeldi okkar barna og kenna þeim að umgangast þennan nýja miðil þannig að þau hafi gagn og gaman af.Breytt uppeldisumhverfi hvetur okkur til að taka afstöðu og setja börnum okkar mörk hvað varðar Netnotkun.

Tæknilegar lausnir svo nefndar netsíur til að útiloka óæskilegt efni á Netinu eru enn sem komið er ekki fullkomnar. Það eru einkum tvær aðferðir sem notast er við. Önnur gengur út á það að allt er bannað nema það sem er leyft en hin aðferðin nálgast viðfangsefnið út frá því sjónarhorni að allt er leyft nema það sem er bannað. Fyrri aðferðin hefur þann stóra galla að mikið af efni sem hefur fræðslu og upplýsingagildi er útilokað. Seinni aðferðin hefur þann galla að stöðugt þarf að vera að viðhalda þeim kerfum sem nota þessa nálgun. Farsælasta lausnin er því e.t.v. sú að kenna börnunum að umgangast netið, kenna þeim að velja það sem sjálfsvirðingin býður þeim að sé við hæfi en sleppa hinu.